Chairman Cheemala Siva Gopal Reddy chuan Lawngtlai District ṭhalaite leh kut hna thawktute'n mahni kut kawiha intodelhna kawng an zawh theih nan department hrang hrang hnuaiah thiam thil bik zirtirna, skill training tam zawk buatsaih a ṭul thu a sawi a. Ṭhalaite theihna leh thiamna hai chhuak tur leh a ṭul anga chher hriam tura ruahmanna ṭha tak duang thei tura ngaihtuahna seng turin DSC member kal khawmte chu a chah a ni.

He hunah hian District Skill Development Plan ruahman dan tur inkaihhruainate tar lan niin, skill development lama hma lakna tur rawtna hrang hrang sawi ho a ni a. Line department-te'n kum khat kal ta chhunga skill training an lo buatsaih tawh dan leh a rah chhuah te, hmasawn leh ṭan lak ngaihna lai te bakah, District Skill Development Plan-a telh tura an duhte kimchang taka sawi zauna nen ziakin tun kar chhungin DC office-ah theh lut se, chumi aṭang chuan Lawngtlai DSDP chu duan ni se, tih a ni.